Serikali imesema itaiwezesha Taasisi ya Elimu Tanzania (TET) kuwa na uwezo wa kuchapisha vitabu vyake nchini badala ya kutegemea viwanda vya nje ya nchi.

Hayo yamesemwa terehe 14/05/2022 na Waziri wa Elimu,Sayansi na Teknolojia Mhe.Prof. Adolf Mkenda (Mb) wakati alipotembelea viwanda vya uchapaji vy TET.

"Hapa lazima kuiwezesha TET ndani ya mwaka mmoja iwe imepata mashine kubwa ya kuchapa na kutafuta tenda nafuu ya malighafi ya karatasi kwa ajili ya uchapaji wa vitabu ili kuhakikisha inaongeza ajira kwa watanzania kupitia viwanda hivyo" amesema Pro.Mkenda.

Hata hivyo, Prof. Mkenda amesema serikali imedhamiria kuimarisha uchapishaji kwa kuiwezesha TET kupata karatasi kwa bei nafuu, umeme wa uhakika na mashine kubwa ya kisasa ya uchapaji.

Pia aliielekeza TET kutumia wataalamu wote wa nchini na wa nje ya nchi ili kuweza kufikia malengo katika ubora.

Aidha aliipongeza TET kwa kuanzisha mfumo wa kusoma vitabu kwa mtandao (maktaba mtandao) na kusema kuwa utasaidia walimu na wanafunzi kupata vitabu kwa urahisi na kwa gharama nafuu.

Kwa upande wake Mkurugenzi wa TET Dkt. Aneth Komba amesema kuwa Kiwanda cha uchapaji cha Press A ni moja kati ya viwanda saba vya taasisi hiyo na walikabidhiwa na wizara tangu mwaka 2019.

Ameeleza kuwa viwanda vya TET vinatumika kuchapa kazi mbalimbali za Serikali na mashirika binafsi.